2016年2月27日 星期六

2015-2016 歐洲上網 SIM 咭實測大比拼


自從 FB 流行,4G 網絡成熟,無線分享器 (即 3G MODEM) 價格回落,外地上網 SIM 咭賣到成行成市,出租 MODEM 服務亦如雨後春筍,令人花多眼亂。近年外出旅行其中一個指定動作就要買咭或「租蛋」上網,由於我對於租蛋服務無好感,所以近來外遊都係買 SIM 咭去用,集合近年多次外地 SIM 咭上網經驗,今次就寫篇歐洲上網 SIM 咭實測比大家參考下。

各種歐洲上網 SIM 咭
測試一:歐洲數據卡 1GB 30 天 (購自鴨寮街)
多得台港歐機票,2015 年 9 月出發到希臘,阿爾巴尼亞,黑山共和國,波斯尼亞,克羅地亞,尾站意大利。今次出發前去O左鴨記買O左呢款聲稱 1GB 30 日既 SIM,盛惠 $280,其實買咭果刻仲有其他選擇,但好多只可以用 10 日,14 日不等,咁我有 18 日行程就睇O黎唔O岩用,一係就買兩張 (咁咪成 $500?!),左揀右揀就只有呢張有 30 日限期,加上平時O係香港每個月都係用 1-2GB 數據,所以肯定夠用有突。

聲稱 1GB 數據 30 天使用期的上網咭,基本上包裝寫明呢兩個 KEY WORDS 都應該係呢款咭。
今次行程帶O左華為呢款有 5200mAh 電池既 3G MODEM 去用,咁就可以比電話同 NOTEBOOK 都上到網。華為呢隻 3G MODEM 雖然唔細隻,但佢有成 5200mAh 電量加上有個 LAN 頭可以將酒店既有線寬頻 (日本最興) 轉成無線網絡,咁全面既功能大隻少少都可以接受既。另外佢仲有一個十分可愛既功能,就係識得自己偵測同設定 SIM 咭網絡,簡單O黎講就係即插即用 (O係某O的特定情況下例外,之後會有講),對於O係討論區上O的人成日話唔識 SET APN 呀, SET O左 APN 都上唔到網呀諸如此類既問題幾乎唔會發生O係呢個 MODEM 身上。

華為 3G MODEM,係就係大隻少少,只不過有成 12-15 小時電量,足夠你由朝用到晚。
好啦,到步雅典機場,立即安裝 SIM 咭同著機,唔駛 3 分鐘就可以上到網,網速估計有 3.5G 左右,上 FB,上載相片,睇 FB 片,開 GOOGLE MAPS 都好夠快,而且定位亦都十分快,對於我呢O的一出門就要 GOOGLE MAPS 既人係,初步算係合格啦。

呢張咭O係大部份地區訊號都好強,就算坐夜船O係海中間,都有 2-3 格 (最高 5 格) 訊號,估計佢個漫遊合作既電訊商都比佢一個幾高既優先權,O係呢方面真係幾抵讚。

今次巴爾幹半島之旅,有 7 日停留O係希臘,當去到最後一站科孚島,O係最後一日就發現一個好嚴重既問題,一早起身開 FB 睇睇,點知 LOAD 好耐都 LOAD 唔到,最後發現張 SIM 咭上唔到網,試過 RESTART 隻 MODEM,改 SETTINGS... 都唔得,開頭我以為已經用爆O左佢果 1GB QUOTA,加上果日就要搭船去阿爾巴尼亞,唯有去到先再算。

由於阿爾巴尼亞,黑山,波斯尼亞同克羅地亞平均只逗留 2.5 日,所以就打消O係當地買 SIM 咭既念頭,結果去到意大利完結行程都無得出街上網。事後再檢查 MODEM 既流量,發現只用O左 700MB 唔夠,咁點解會上唔到網呢?呢個真係一個迷。

結論:呢張真身叫做 MUNDO 既 DATA SIM 速度合理,而且好多地方都收得唔錯,包裝所示覆蓋國家都非常多,連冷門既波羅的海三國,斯洛伐克,塞浦路斯都覆蓋到,都咪話唔勁。但最大問題就係只係用O左 7 日就上唔到網,但流量未過 1GB,點解會咁樣呢?睇O黎同包裝上寫既 30 日有好大出入。如果旅行日子係多過 7 日既,你要考慮係咪買多一張定係揀另一O的聲稱有 10 或 15 日既 SIM 咭。

測試二:香港行 4G $300 儲值咭 超值歐洲漫遊數據套餐 (都係購自鴨寮街)
又係多得台港歐機票,2016 年 1 月流流走去英,法,葡三國捱凍。經歷過上次 1GB 30 日既「騙局」後,今次幫襯誠哥買O左呢張 14 日歐洲漫遊咭試O下。睇個包裝寫住「香港行」,實質係 3 香港既儲值咭,最大特點就係可以買番 3 既增值劵去增值。

香港行歐洲數據咭,聲稱可用 14 日無限數據
使用呢張咭係有少少技巧,開咭後要輸入 USSD 碼去啟用指定服務計劃先可以用到,否則就有機會按每 kb 計費直接扣除儲值額。同上次一樣,啟用好指定服務計劃後就將張咭裝落華為 3G MODEM 度,今次就要做多少少野,就係O係 MODEM 度手動選擇網絡供應商,根據包裝指示O係英國要使用 3UK,連到線後 MODEM 就自動設定哂所有野可以上網。由於呢張咭聲稱係 4G,所以 3G 都可以兼容,今次無測網速但使用上比起 MUNDO 無咁快,但上 FB 開 GOOGLE MAPS 都唔錯,定位都叫做快,心諗今次無中伏啦掛,有 14 日用應該無問題啦。

澤西島,到步後人都唔多個,但十分舒服。
倫敦 3 日行之後下一站本來到澤西島,呢個英國屬地就無 3UK 覆蓋,而且只有幾個鐘其實都無所謂,加上澤西島市中心唔係大,無 GOOGLE MAPS 都無問題。再下一站就係法國聖馬洛,到步後就更改 MODEM 既網絡供應商做法國 ORANGE 就上到網,O係聖馬洛呢幾日上網感覺仍然唔錯,直到去到波爾多就發覺唔對路,到步波爾多第二日開 GOOGLE MAPS 發現 LOAD 得好慢,慢到要等成半分鐘先 LOAD 哂畫面,開頭以為收得唔好就 REBOOT 隻 MODEM,情況無改善,但又未去到完全上唔到網,唯有玩住先。過O左兩日發現連 WhatsApp 出一句訊息都要等,睇O黎唔多對路,今日只係開咭第 9 日,連線速度比 2G 仲要慢,但由於已經係最後一日O係法國,所以都無奈接受。

最後一站葡萄牙里斯本,到步後經酒店介紹,買O左一張價值 5 歐元既 4G SIM 咭,有 1GB 流量 ,而且仲可以放落 MODEM SHARE,認真抵玩,得四日O係里斯本肯定夠用。裝好咭後,MODEM 一如既往自己設定哂O的野立即上到網,實地開 FB, IG 同 GOOGLE MAPS 都十分流暢,第二日租O左車用埋導航定位十分快同準,由於隻 MODEM 只有 3G 但已經十分流暢,我相信如果上到 4G 應該會有更好表現。

里斯本購入 1GB 數據 4G 咭,已備有 MINI SIM, MICRO SIM 同 NANO SIM,當地售賣 SIM 咭舖頭有售。
結論:3 香港呢張聲稱 14 日無限流量漫遊咭實在令人失望,已經跟足指示開咭同選用服務,上網速度不過不失,但只係用O左 9 日 (嚴格O黎講第 8 日已經慢到不行),要我O係行程尾段另外再買咭上網,實在好唔方便。錯有錯著O係里斯本買到呢張有 1GB 流量既 4G 咭,仲要無限制落 MODEM 用,加上只係賣 5 歐元,如果以 CP 值去評價呢張咭,我會比最高分佢!

測試三:再次證實歐洲數據卡 1GB 30 天實際只可用 7 日 (同樣購自鴨寮街)
今次出發去瑞典睇極光,由於已經對 3 香港果張 14 日咭無哂信心,加上直到呢一刻我仲覺得上次果張 1GB 30 日既咭係自己用得太盡所以幾日就用爆 1GB,O係揀無可揀既情況下唯有翻兜呢張咭,雖然包裝不同,但張咭同樣係 MUNDO 產品。好,比多一次機會你,希望呢次 13 日既 TRIP 你生生性性。
不同包裝歐洲上網 SIM 咭,其實都係同一張咭
因為之前已經用過,所以大概知道佢有幾快。由於落機同一日傍晚就過夜搭火車去目的地,O係斯德哥爾摩市中心使用都不過不失,但因為有上次希臘既不快經歷,所以趁未上火車前O係附近行O下兼睇睇當地既 DATA SIM 價錢。咁O岩見到有間 3 SHOP 就入去問下有咩 DATA SIM 可以揀,基本上 95SEK 有 1GB 流量,但專門店就無得賣,店員表示可以去 7-11 就買到 (無錯,斯德哥爾摩市中心有好多 7-11,密度可以同日本或台灣既便利店有得比),收完風之後就放心搭火車。

由於呢程過夜火車有成十幾個鐘車程,所以上車後其中一個打發時間既行為就係上網,但主要都係開 FB 睇。開頭果幾個鐘都幾流暢,但之後就開始覺得慢同無反應,檢查 MODEM 狀態就發現 3G 訊號係 0 格,甚至係 no service。同卡既當地人仲上到網,因為佢個台係當地覆蓋最多果間,而我張 SIM 就揀唔到呢個台O黎漫遊,既然無得上網就唯有訓覺。

一訓醒來火車外風景
終於O黎到北極圈城市 KIRUNA,一訓醒就立即開番哂O的電話同 MODEM,3G 連到線,開 FB 同 GOOGLE MAPS 都流暢,就此開始呢個 5 日極光之旅。O係呢 5 日裡面,除O左市中心外,都有去過距離市中心 30-60 分鐘車程既地方,呢張咭既接收都唔錯,平均有 3 格左右,有時覺得快過 HOSTEL 既 WIFI (可能個 WIFI 多人用所以慢)。一連用O左 4 日都無乜問題,而且今次特登 CHECK 住個流量以免過早用爆果 1GB 流量。到O左第 5 日,亦都係要離開 KIRUNA 既日子,唔想見到既事終於發生,無錯,就係張咭上唔到網,入去 MODEM 度睇O下個 STATUS,果然同上次希臘一樣,流量大概用O左 500MB 左右,個 3G 連下又斷連下又斷,我知道張咭應該已經玩完,計一計日子又係 7 日,結果當晚通宵火車又係無網上既情況下乖乖去訓,已經諗定一落車就去買張 DATA SIM O黎用。

KIRUNA 呢個冰封小鎮基本上唔係好大,全個鎮兩萬人唔夠,但就要面對住地陷危機而要搬遷新市鎮,可能過幾年後再O黎又已經唔同光景。
同卡識O左個台灣男仔,佢係O黎瑞典交流半年,同佢都傾得幾咀,O係落車後佢送O左一張 SIM 咭比我,佢話呢張 SIM 咭都係人O地送,而佢本身又已經有所以就送比我,我只要去增值就用得。之後去O左便利店買增值劵,店員同我講可以買 1GB 流量,只要 50SEK 就有交易。咦,竟然比 3 平咁多,當然二話不說就買,增值方法都係用 USSD 就 OK。呢張咭本身有 4G 但放落隻華為 3G MODEM 都十分快,我估應該有 3.5-3.75G 既速度,下載檔案有接近 1MB 既速度。O係斯德哥爾摩幾日既表現都十分好,直到上船出到公海前都收到,呢 50SEK 真係超值!
台灣男仔送既當地 DATA SIM,同樣已有 MINI SIM, MICRO SIM 同 NANO SIM,瑞典便利店有售。
旅程最後兩日就係芬蘭既赫爾辛基渡過,雖然得兩日,但用開 GOOGLE MAPS 搵食點可以一日唔上網呢,即管去睇O下呢度既 DATA SIM 點賣。市中心唔見有專門賣 SIM 咭既舖頭,就試O下去火車站既便利店問問,店員介紹呢隻 DATA SIM 價值 6 歐元,可以增值。翻開包裝說明,張咭本身已經有 6 歐儲值,如果用電話上網就為每 1MB 為 0.066 歐,計落條數即係唔增值都有 1GB 流量,得兩日時間一定夠用,考慮O左一陣就科款走人。呢張咭又係即插即用,MODEM 自己設定所有野,速度不錯,開 FB 同 GOOGLE MAPS,由於只有兩日時間使用,所以就好放心開串流片睇,睇片都十分流暢,估計有 3.75G 既速度。

芬蘭便利店買到既 DATA SIM,價值 6 歐,有 6 歐儲值,基本上一開咭就可以用到 1GB 數據。
結論:經過兩次旅程既實測,我可以肯肯定去證明呢類所謂 30 日 1GB 流量既 SIM 咭根本就只可以用到 7 日,而後來上網 CHECK 返佢個網頁,呢款咭唔可以再增值,網站亦都無顯示佢有 30 日既 DATA SIM 賣,所以包裝上寫既 30 日根本就係假既,而流量有無 1GB 就唔肯定。瑞典本身係一個通訊發達既國家 (ERICSSON 就係瑞典牌子),加上 7-11 林立,買張 DATA SIM 上網根本無難度,而且價錢仲好平 (1 港元約等於 1.15 瑞典克朗),根本就無需要O係香港買定咭過去。而芬蘭購買 DATA SIM 亦都好方便,基本上 6 歐元面值就有 1GB 數據,同樣抵買過鴨寮街既 SIM。

總結:香港買得既歐洲上網咭質素參差,就算係大牌子都中伏。呢張 MONDO 雖然就可以多國漫遊,但問題係得 7 日限期,7 日可以去幾多個國家呢?究竟想要多國漫遊,定係想去到當地買平靚正 SIM 咭真係自己衡量。不過可以咁睇,200 幾蚊可以玩到 7 日圍埋都係 30-40 蚊一日上網,應該比租 WIFI 蛋平得多。而 3 果張歐洲漫遊咭感覺比 MONDO 伏得多,因為佢寫住「14 日無限數據」令人覺得 14 日內都有同等既使用體驗,但給果事與願違。曾幾何時有一種出租日本 SIM 既服務,但效果就真係好不堪,有機會都寫下唯一一次既使用感。

歐洲當地購買上網 SIM 咭十分方便,報紙檔,便利店甚至超級市場都可以買到,今次旅程可以實測瑞典,芬蘭當地既上網 SIM 咭,實在太令人喜出望外,除O左價錢非常合理外,而且速度無得輸。最後當然要講埋葡萄牙果張 4G DATA SIM,面值 5 歐元有 1GB 數據,速度快,O係咁多張外地購買既 SIM 咭呢張可謂 CP 值最高,大力推薦!如果想知O係邊度買可以留言比我。

另外想講埋華為隻 3G MODEM,當而家 4G 流行時可能覺得 3G 唔夠快,但睇返規格呢隻 MODEM 最快可以支援到 43.2Mbps (HSPA+) 下載,而且可以連接 10 個裝置,加上 $700 有找既售價 (市面上最平既 4G MODEM 索價 $1300 左右) CP 值十分高,旅行時用O黎 GOOGLE MAPS, 上 FB 或上載照片到 IG 都十分方便夠用。有人怕唔識設定搞到得物無所用,呢曾唔駛擔心,只要將 SIM 咭部份全部設定做 AUTO 就可以根據 SIM 咭參數自行設定,基本上換完咭等幾分鐘就可以上到網。

伸延閱讀:
3UK SIM 上網咭使用體驗評 2016-2017
2017 德國實測歐洲上網 SIM 咭大比拼 (3UK, 聯通香港, WeChatGo)

2016年2月24日 星期三

新年追光到瑞典 PART 1


呢個標題,其實連我自己都唔敢相信!點解?因為我係一個好怕凍既人,一月流流走去英國得果幾度已經覺得自己好傻,家陣竟然仲要去睇極光,極光呀,要去北極圈O架!係咪黐O左線?其實真係黐O左線,因為舊年買落既「台港歐」機票實在太屈機,三程機盛惠四千蚊,教我如何不黐線?

好,講返正題,因為買到平機票所以就天寒地凍都要O黎一次北極圈睇極光。之前上網睇到好多人去芬蘭,我就想特別O的唔去芬蘭就揀O左瑞典落機,為既就係唔想見到一班香港人。

今次係我一個月內第二次搭漢莎航空,相比我之前搭過既長途機好國泰,英航,中華,卡塔爾等... 漢莎係咁多間O黎講 C/P 值最高 (梗係以我買飛既價錢去睇啦),坐得好舒服,記得舊年坐英航都唔可以安樂訓到落機,但漢莎兩次扣搭都可以一覺訓到落機,相信無邊幾間既 EY CLASS 做得到。

初一上機,初二先到步。估唔到一落機就甩轆。話說瑞典度度都可以碌咭比錢,連買車飛都碌得,果然名不虛傳,一拎完行李就有幾部售票機買車飛,有火車同巴士。先睇火車,機場快線盛惠 4XX 克朗 (嘩!即係成四百幾蚊),再睇O下巴士 120 克朗 (都成 120 蚊O架),O係無得選擇之下揀O左架「平」既去坐,諗住碌咭比錢啦,點知部售票機個篤 MON 傻傻地,本來買一張篤一張,點知無反應就撳多幾野,部機竟然慢比拍加O左成十張飛落去,諗住等佢停低後要減番人數,明明見住佢減到變一位先碌咭,但好衰唔衰個咭機無顯示銀碼,到完成交易時印O左七張飛出O黎!今次真係樣衰。好在去到巴士站問個職員有解決方法,就係好傳統咁填好張表,寫低咩原因,再連埋張飛一齊寄返去佢公司處理,連信封都比埋我真係抵讚。

落機當日下晝就搭去 KIRUNA 既夜班火車,中間幾粒鐘只係O係火車站附近 FING 下,不過都幾多野睇,唔知點解呢樹好多 BURGER KING,差唔多火車站一間,地面大街又一間,去到另一條街又有一間。另外見到最多既就係 7-11,密度比日本更誇張,但O係我印象人,歐洲人好係唔興便利店呢家野,今日見到斯德哥爾摩有咁多間 7 仔,梗係要入去貢下啦。




因為瑞典並唔係用歐元,所以要唱O的錢先可以行街,雖則度度都可以碌咭,但有個錢旁身始終安心O的既。先前O係機場用 1.015 唱O左三百蚊港幣 (無錯,係港幣,當地有港幣牌價O架) O黎旁身,但就O黎要去 KIRUNA 呢O的村落,唱多幾百蚊穩陣O的,就睇O下火車站有無得唱,問O左旅遊中心話得地面同地庫兩間找換店,個匯率又其實差唔多。其實真係心有不甘,於是 GOOGLE O下有無得揀,答案原來係有既,仲要O係附近,於是就拖埋個篋 (係呀,拖篋呀,鬼叫要帶埋腳架咩) 去睇O下咩料。去到見到個牌價差唔多,但O黎到唔唱錢又好低能,於是就唱O左 50 歐,順便問句O的匯率好似間間差唔多,對方一句 KO 我 "我O地唔收手續費呀",好野好野!你O岩!

如事者唱多五百幾,加埋求先果三百幾,夠用啦掛?之後就O係附近 GOOGLE 到既 FOOD COURT 食個晏,一睇個餐牌,嘩!成九十蚊一碟飯,最平都七十幾,睇O下呢八百幾蚊都唔係咁見駛。講番個碟飯又真係幾好食,唔係呃鬼佬既唐餐 OK,推薦可以再幫襯。


終於搭火車啦,去到月台離遠聽到O的廣東話聲,竟然呢樹都見到香港人,雖然無同佢O地打招呼,但覺得可能之後仲撞到更多。上O左車後,同卡既係一個荷蘭人,但O係瑞典做野,同佢傾O左好多野,天氣,民生,政治咩都傾一餐,問佢會去邊,原來佢會去比 KIRUNA 更遠既一個鎮玩爬冰山同埋露營,真係好癲!當然我都問O左佢好多睇極光既野,佢都建議我可以租車玩,但時間太抆唔知租唔租到。後來又上O左四個大陸人,有兩個已經入籍瑞典,另外兩個就中陸過O黎玩,佢O地同我一樣去 KIRUNA 睇極光,不過佢O地已經 BOOK 好哂 LOCAL TOUR,而我就咩都無做過,諗住見步行步。






到步 KIRUNA,落車又聽到廣東話,望真O的唔係尋日見到果幾個,上前搭訕原來O係O黎歐洲 EXCHANGE 既學生,然後傾O下傾O下就一齊 FING O下一陣,食O左當日第一餐晏,又去O左當地名勝木教堂,見到佢O地又諗番以前讀書既日子係幾咁幸福。時間過得好快學生仔去 LOCAL 報到,我亦去 HOSTEL CHECK-IN,由於 5 點左右就開始天黑,CHECK-IN 後去埋超市入貨後就返 HOSTEL 煮飯仔,本來想食完飯出去碰下運氣睇O下見唔見到極光,點知一望天空太多雲,天氣報告都話成晚有雲,到最後都打消念頭,乖乖O係 HOSTEL 上網就過O左第一個晚上。



由於一落飛機即晚又坐通宵火車,所以嚴格O黎講有成兩日無沖涼,但其實唔係太覺,因為瑞典實在太凍,而且又幾乾燥,所以幾日唔沖涼都唔係一個問題,最大問題就係三日無剃鬚搞到成個野人咁樣。

2015年12月10日 星期四

去旅行, 去到盡!


2016 年都O黎梗頭先學人打旅行 BLOG,乜野題目都比其他人打哂啦,仲有乜野好打?

今日O係某旅行網睇到一篇文章題目為「一個人的 86 天歐遊計劃」,對於一般朝九晚八既香港人O黎講,除O左炒老細魷魚外根本就無可能去成 90 日旅行。我覺得對於香港人O黎講,O係呢個生存咁艱難既地方,除非你無咩負擔,即係後生,單身,有氣有力果隻,如果唔係莫講話 90 日, 9 日既旅行都已經係一件奢侈既事。


講開 9 日既旅行,應該係講星期六出發,下星期日返歸,好處係用盡頭頭尾尾既週末,壤處就係星期日返到O黎香港氣都未抖順第二日就返工,所以好多人都會夾下O的公眾假期去旅行,一O黎就係慳番O的年假,二O黎砌O岩日子既話返到O黎香港仲可以休息一日先返工。我諗全世界只有香港先會連放大假都要算過度過,無辦法香港人係世界上最勤力既人類。

題外話講完,O係度我想講O下一般打工仔,一年總要豪一次既旅行可以點樣玩,呢樣好似比果O的 86 日歐遊或者 3 個月去南美O黎得實際。假設每年大假有 12 日,而你又想去一個 12 日既旅行,扣除兩個週末既 4 日,尚要請 8 日大假先得,如此一來就剩番 4 日大假,好似好唔見駛。如事者,就會向O的公眾假期埋手,假如有 3 日公眾假期O係返工日既,咁就可以慳多 3 日假,但你亦都知道長假期機票一定超貴,對於一般搵萬零兩萬蚊既打工仔O黎講,放得 12 日假就梗係去遠O的架啦,例如歐洲。旺季既歐洲機票至少都要 8 千幾至萬中不等,雖然話一年總要豪一次,但我極唔贊成豪O左O係張機票度。

12 日歐遊梗係一個大 PROJECT 啦,所以要預番O的時間去設計,規劃同埋採購。無錯,重點係採購,究竟應該幾時買機票先好價錢呢?幾時訂酒店,幾時訂乜乜物物呢?不如講O下機票先,話哂佔成個行程最大支出之一,呢個支出越平,到時去到當地就有更多預算去食好O的,住好O的,咁先叫做豪一次嘛。


隱藏版特價機票,一張飛,兩個 TRIP
留意特價機票,有時有O的網站會神神秘秘咁推出一O的價錢超乎想像咁平既機票,例如上圖顯示 $4133 就買到三程既機票,眼利既就會見到第一程由台北去香港,第二程由香港去歐洲,第三程由歐洲去香港。呢種組合既機票有人話係系統漏洞,有人話係網站限時推廣,不論係乜野原因,只要你繼續篤落去直到完成比錢,呢張飛就係你O架啦。曾經有人試過 3 千蚊有找交易到,視乎你飛邊度而定。

有人會問,呢度三張飛,第一張由台北返香港咁騎呢?可唔可以唔去呀,答案係唔得。根據機票原則,同一個訂位號碼既第一程無用到,之後果兩程會自動失效。

既然咁騎呢,你大可以將呢三張飛視為兩個行程去睇。台灣飛香港既日子可以不同於/不近於飛歐洲既日子,就唔駛咁頻能啦。

其實飛台北,台中都有好多平飛選擇,仲可以買單程添!

平價自製兩個 trip 完全無難度!

要買到呢類特別組合既機票,就要成日 CHECK 住佢個網有無 UPDATE 先得啦。

2015年11月29日 星期日

台灣六天環島鍊車行 PART 3


雖然枋寮呢個小町十分舒服,但為環島終需一別。以為 07:00 起身,07:15 出門口買早餐會係最早果個,點知一去到轉彎果間早餐店時,已經有一班人o係度堂食中,另外仲有幾個人o係度等外賣。其實係我以為自己好早定係佢o地不嬲都係咁早起身呢?

極速食完個蛋餅豆漿早餐就立即出車,時為 07:30 左右。經歷過尋日 over run 既慘痛後,今日誓必準時到步花蓮。但 GOOGLE MAPS 話比我知今日要行 300 公里路,唔知會唔會又甩轆收場呢?既然行到呢一步都無得返轉頭,老虎就老虎啦!


枋寮既鐵馬客棧,細小但舒適
台 9 線沿海而建,如果有時間落車休個息影影相,欣賞太平洋既絕景
今日有兩大任務:
1. 挑戰全台最長碎石路 197 縣道
2. 拜訪全台最美麗道路 193 縣道

起步沿台 9 線向台東方向出發,開頭四線行車行得十分爽,幾乎係逄車過車,好不開心。直到台東縣界前就收剩來去各一條線,令人煩惱既旅遊巴又再O係前面出現,焗跟十幾分鐘先搵到機會抽佢頭,但龜速既旅遊巴又何只一架呢?結果要花兩個鐘先去到第一站──太麻里火車站,時間為上午 10 點 10 分。


台 9 線沿途既休息處都好有特色
太麻里火車站有乜野特別呢?早排網上流傳過一輯相,就話台灣都有一個平交道位置同「鐮倉高校前」既平交道有九成似,而呢個平交道就係O係太麻里車站附近。既然經過,何不順道朝聖呢?如事者就過O黎影番幾張相,順便落車抖下,之後就出發去搵我既 197 縣道。


驟眼睇,呢個平交道真係好似「鐮倉高校前」個位喎!
架車後面就係志航空軍基地
前往 197 縣道途中,突然聽到一聲巨響,個心有O的離一離,定神一刻有架戰機O係眼前飛過!無錯!係戰機!原來呢條路既隔離就係台東志航空軍基地,隨時有戰機升降,本來想捕O下一架戰機降落,但尋日 over run 既陰影作祟下還是作罷。大概一個鐘車程就O黎到 197 縣道入口,縣道 197 全線位於台東縣境內,北起池上市區,南至台東市石川,全長將近60公里,今次由南邊入口北上,入口仍然係好靚既柏油路,唔通我行錯O左?再睇睇 GOOGLE MAPS 證實無錯,唯有驅車繼續前行,大概十分鐘後終於見到傳說中既碎石路,挑戰正式開始!
縣道 197,還未到 14 公里碎石路前風景十分迷人

縣道 197 既碎石路,真係少O的心機都會飛落山崖
當四個轆都O係碎石路上,立即感受到成個操控唔同哂,軚盤變得好輕好浮,尾轆亦都有隨時甩出去既感覺。雖然有 30 公里限速既路牌,但呢一刻我唔敢行快,亦唔敢扭快軚,每一步都小心翼翼,因為根本無可能以 30 公里速度去行走呢條碎石路,大概行O左 10 分鐘已感到架車不斷飄移,其實我只求可以安全完成路段就十分滿足。
台東志航空軍基地
沿路雖然風光明媚,但大部份既心機都用O黎控制住架車既動態,亦因為速度比預期中慢,所以停低影相既次數亦比之前少得多。其實整段 14 公里既碎石路又碎唔哂,偶爾有幾十米既石屎路面出現,睇落似係新舖無幾耐,算係暫緩行碎石路果種緊張。但我又諗如果整段 14 公里都變成石屎路,咁就無O左 197 縣道特色囉?整條 14 公里碎石路幾乎杳無人煙,尤其是O係花東縱谷路段時,真係叫天不應叫地不聞,呢種感覺真係幾弔詭。
14 公里碎石路中,有部份已舖成石屎路
部份碎石路段路面比較闊,可以嘗試一O的唔同既揸法例如輕微甩尾,試O左幾次覺得幾得意,亦都救得到,但條件係條路一定要有 10 米闊,唔係就會連人帶車碌落山,到時真係嗌破喉嚨都無人理你。本以為試玩O左幾次甩尾就掌握到當中技巧,事實上就O岩O岩相反,O係差唔多到尾聲時咁O岩有一班單車友O係友上梗斜,當刻打算收慢O的架車費事嚇親佢O地,點不知尾轆突然甩出O黎,呢一刻立即鬆腳制比少少油想修正架車,但已經太遲,車尾已經向左邊甩出去,成架車 90 度側滑,車速雖唔快但路面窄,一邊滑一邊踩腳制希望佢唔好飆前,否則真係碌落山,但架車仍然繼續滑向前,而車頭亦都向住路邊指向前,O係千鈞一發之時路面右邊有幾舊石壆O係度,咁O岩車頭就向住呢幾舊石壆指埋去,最終頭泵把撞到石壆先告停低,驚魂未定就落車睇睇「傷勢」,真係不幸中之大幸,本以為聽聲停一定成個泵把爆哂,點知只係擦花少少,近裙腳位置就穿O左一個細窿,其實真係呢幾舊石壆救番我一命,唔係都唔可以打呢篇遊記比大家睇。
197 縣道俯瞰
定驚過後繼續行程,碎石路過後亦都係代表花東縱谷已經行完,當經過電光村時兩邊都係田地,由於並唔係插秧期,所以只見到一幅幅泥地而已。最後到達白朗大道所在地既池上鄉,二話不說梗係要試O下名物池上飯包,但又咁O岩O係停車位置有一家牛肉麵店,而且睇O黎都幾多日幫襯,所以就決定首先食一碗牛肉麵,然後再去食池上飯包,咁就一次過滿足兩個願望。
一行完碎石路立即停低定O下驚

食飽飽後就梗係幫襯O下當地農會超市,買幾包池上米返屋企嘆,當然只係買 2KG 果隻。買完後立即驅車繼續上路,下一站 193 縣道。
197 縣道起點

馳名既池上飯包,門口有成卡火車比你一嘗火車便當滋味
完全符合商品說明條例,好野!


台灣常見既紅綠郵筒,仲有「停看聽」牌

賣米O者,唔駛咁華麗話...

池上飯包,終於到我食啦!

沿台 9 線一直行,轉行台 30 線,去到分叉路靠右就進入 193 縣道範圍。193 縣道又叫樂德公路,全長 110 公里,翻查維基為全台最長縣道,而且全條縣道都係O係花蓮縣之內,所以當進入縣道即代表已進入花蓮範圍。沿路兩邊都可見一覽無垠既田景,配以中央山脈做背景,一幅又一幅既油畫級風景就O係眼前出現。縣道 193 比縣道 197 工整得多,整條路同台 9 線平行而上,但論風景一定係 193 縣道完勝,因為縣道 193 海拔比台 9 線高,所以隨便一個位都可以俯瞰整個花東河谷。
停車隨手影,193 縣道果真名不虛傳
縣道 193 果真名不虛傳,雖然而家唔係插秧季節,但沿路都可以睇到好靚既水稻田,平靜既水田,加上開揚既景觀,一個完美既倒影就在眼前,隨便舉機都可以影到張靚既相。又因為咁樣所以今段路所用時間比預期長,但都係值得,O黎到 193 縣道就係要影靚相吧。

就O黎日落啦,穌光照稻田
一路上行行停停,不知不覺就O黎日落,希望今日唔好又天都黑哂先到住宿。好在O係大概 5 點鐘就到花蓮大橋,意味住要進入花蓮市區,而最靚景觀既 193 縣道亦都到此為止。再揸多半個鐘左右終於去到住宿處,但呢間住宿既 CHECK-IN 好特別,首先要O係門口既電話打去接待處,核對完身份後就講低大門同房門密碼,之後就自便。哈,呢個玩法又幾新奇,成間民宿可以一個人都無,我諗只有台灣先做到。擺低野之後就出發去行夜市。花蓮既夜市對上果次O黎好似係 2005 年,原來成 10 年既事!今次再O黎發現果個好大既鐵皮棚已經無O左,換O黎係一個新既夜市叫做福町夜市。其實福町夜市係東大門夜市既一部份,另外仲有原住民一條街同各省一條街三個地方組成。成個夜市面積比以前大幾倍,但唔知係咪因為有毛毛雨,所以行既人唔多,係部份食肆比較多人等位外,成個夜市都行得幾舒服,不過都留意到有部份檔口未有出租,呢個可能都係少人行既原因。花蓮夜市有個特色就係有好多檔鋸扒既攤檔,仲有好多檔玩遊戲例如拋樽,射槍等... 呢個新既夜市都一一保留到,但唔知係咪中間條路太闊,感覺上唔及以前咁熱鬧。
193 縣道必經既花蓮大橋


扒鋸完,愛玉冰飲完,又係返去休息之時。因為夜市同住宿有一段距離,所以都係以車代步,返到去後就咁將架車泊O係樓下就 OK,呢種便利只有台灣先有。
東大門夜市其實由三個夜市組合而成

地方乾淨,路面寬闊,點睇都唔似去開既夜市

夜市基本盤,食哂應該行唔郁

花蓮女鼓神,勁呀!

今時今日仲有呢O的野抽,真係好懷舊

有原住民現場表演,好正

點解夜市中間會有一幅攀石牆既?

今日總算係準時完成 300 公里路,經歷過 197 縣道既刁難,193 縣道既美景,去到花蓮仲可以輕鬆行夜市,我知道今日真係賺O左。聽日最後一日啦,希望聽日行蘇花公路都順順利利就好啦。

第三日路線參考:

伸延閱讀:
台灣六天環島鍊車行 PART 1
http://chungsiutravel.blogspot.hk/2015/11/part-1.html
台灣六天環島鍊車行 PART 2
http://chungsiutravel.blogspot.hk/2015/11/part-2.html