東京搭車小分享

雖然去過日本不下十次，但東京好像不過幾次，對上一次還要自駕遊 (！！)，所以對於如何在東京都內移動其實都很無概念。

近日再訪東京都，沒有行程，沒有計劃，更沒有租車，只憑過往搭車的微弱記憶來開始這次行程。

到步東京由銀座開次這個無行程之旅，根據住宿建議的路線，在銀座搭地下鐵到上野稻荷町就可到達。到達地鐵站後購買了東京地下鐵及都營地下鐵共乘 day pass 開始這次純搭車東京行。

在沒太多行程束縛下，第一日只去了上野及秋葉原，其實用不過 day pass 的 1000 yen。

直至第二日，在 hostel 取得東京地下鐵路線圖後，才對東京的地鐵網絡概念更清晰。今日決定只買東京地下鐵的 day pass，原因有三：

1. 東京地下鐵的網絡覆蓋差不多是東京都絕大部份的地區
2. 純東京地下鐵 pass 只是 600 yen 而已
3. 東京地下鐵 pass 是以開用的 24 小時計算，而兩鐵共用 pass 只可在當日內使用，兩者相比東京地下鐵 pass 是比較抵用

第二日行程比較進取，因為想試坐東京都內唯一地面電車，所以就去了三之輪站乘坐都電荒川線為當日行程開始，順便去王子站看看當晚跨年的巡遊活動資料順便探路。都電荒川線是都營地下鐵的路線，day pass 是獨立發售，即無論是兩鐵共用 pass 或都營地下鐵 pass 都不適用。其實這張 day pass 只是 400 yen，搭乘三程已值回票價。

跨年日所有地鐵和 JR 都通宵行駛，雖然說東京地下鐵覆蓋十分全面，但由王子站回到上野，都要轉乘一次都營地下鐵，不然要坐多若干個站才可以轉車。雖然都營地下鐵路線並不多，但經過這次轉車後留意到都營地下鐵的路線都是很 “策略性” 的，例如新宿線和大江戶線。即是說如果你想由上野去新宿，轉乘一次新宿線會比單獨轉乘東京地下鐵會快得多。

第三日已開始掌握到東京地下鐵的搭車策略，加上 Google maps 協助，幾乎整個旅程都以東京地下鐵來完成。

由於想造訪一些大型商店，而這些商店都是在東京都的邊陲位置，需轉乘其他鐵路如小田急線，東急線等。有一次就需轉乘小田急線到成城學園前站，這次體驗既特別又令人覺得日本人的細心如何令人感到方便。在代代木上原站下車後，月台的另一面就是小田急線，情況就好似旺角站一樣，只要行過去就可轉車。但我手持的是東京地下鐵車票，沒有小田急線車票，那怎出閘呢？當下車後，只要到案內窗口和職員說由哪個站上車，補回乘車差價就可以出閘，整個過程非常順暢，幾分鐘內科款出閘，我想日本人應會更快。

都電荒川線車上售票機，可現場購買一日票

都電荒川線其中一站──荒川車庫前

都電荒川線其中一站──王子駅前

最後想講一下來回機場的交通，一般來講可以搭 JR, JR 的 NEX 或京城機場快綫來往。另外還可以坐機場巴士。機場鐵路由二千幾 yen 至四千幾 yen 不等，好處是快和簡單，壞處是出入車站要秤住那個十幾二十 kg 既篋上落，你都咪話唔甘，所以機場巴士就有存在價值，除咗免除秤住個篋上落車站外，仲可以比鐵路更點對點去到所住酒店，當然兩者價錢都不菲。

今次去東京，住宿有講到可以坐 1000 yen 既機場巴士到銀座，但出來時找不到那裡上車，只好坐回橙色車身的機場巴士出銀座。到步後才知道那個 1000 yen 的巴士資料，雖然有點呻笨但回程時知道如何搭車，算係輸一半吧。


先前提過既京城線除機場快綫外，另有普通既特急線一樣可以去到機場，票價約 1200 yen，大概一個鐘就可以由上野到機場。

呢幾日既日本之旅，最大得著就係對於東京都既鐵路交通比以前更了解，而且到了 2017 年既今日仲有紙本地鐵圖比遊客。我想講雖然有 PDF 版既地鐵圖，但紙本圖既優勢係可以一眼過睇到兩個站既位置同埋中間轉車站既位置，對於快速計劃一次行程十分有幫助，最少可以慳到好多時間。

喺香港好憎坐地鐵既我，去到東京搭車第一選擇一定係地下鐵。

3UK SIM 上網咭使用體驗評 2016-2017

本來開呢個 BLOG 係想寫低去旅行既體驗同心得，但經過若干個月既洗禮後，最多人睇既 POST 竟然歐洲上網咭果篇，而且仲有好多留言，呢個真係出乎我既意料。有見及此，再寫多篇上網咭實戰體驗，希望多個選項比各位歐遊既朋友去揀。

2016 年尾再次執好相機腳架，再次向北極圈出發追極光。出發前循例到鴨寮街買 SIM 咭，其實兩三個月前已經留意到鴨寮街開始有 3UK 既 SIM 咭賣，分別有 1GB 14 日, 3GB 30 日 同 10GB 6 個月 (不肯定) 賣，問過 1GB賣 $180, 3GB 賣 $220, 另一張無問過，因為無機會用到。最後手入 3GB 30 日，因為價錢爭好少，其次係唔想有上次既「意外」發生。

首先講講呢張 3UK 既覆蓋先啦，根據官網所示有 42 個國家/地區有服務，包括香港同澳門。而歐洲國家就有奧地利、比利時、保加利亞、海峽群島 (英國)、克羅地亞、塞浦路斯、捷克、丹麥、愛沙尼亞、芬蘭、法國、德國、直布羅陀、希臘、匈牙利、冰島、人島 (英國)、以色列 (以色列踢歐國盃，所以計埋落去)、意大利、拉脫維亞、列支敦士登、立陶宛、盧森堡、馬耳他、荷蘭、挪威、波蘭、葡萄牙、愛爾蘭、羅馬尼亞、斯洛伐克、斯洛文尼亞、西班牙、瑞典同瑞士。

相比上次去歐洲用果張 SIM 咭，呢張既覆蓋全面得多，而且仲可以放落 WIFI 蛋度用或開啟電話既無線基地台用 WIFI 分享訊號比其他無線裝置 (tethering)，講到呢度張咭都算幾無敵，實際用落會係點呢？就由再追光呢度開始講。

今次追光同屋企人去，本來打算買一張 3UK 既 SIM 再放落 WIFI 蛋分享，但屋企人想自己隨時上網所以最後買兩張 3UK 3GB 既 SIM，一張落 WIFI 蛋另一張就裝落 IPHONE 6。根據指示，安裝好 SIM 咭後就需要設定 3UK 專用既 APN，否則就一定用唔到，由於每款電話設定 APN 既位置都有所不同，所以具體設定就唔會詳述，有問題可以搵番相關廠牌既技術支援。3UK 既 APN 設定可以參考下面張圖：

3UK 呢張咭有個好處，就係唔似上次用果張 MUNDO 咁有限制 (MUNDO 只限每日使用 100MB，過量會預扣下一日既 100MB)，所以可以放心上 FB, IG 同上載相同短片 (當然唔好太過量)。

由於航班被改動，原先經慕尼黑轉機到斯德哥爾摩就變成蘇黎世轉機，而且仲要等成五個鐘先轉到，好不可憐。機場可行既範圍有限，唯有上下網打發時間。呢張 3UK SIM 確實厲害，只要設定好 APN 後立即可以上網。一如上次旅行，我仍然用梗華為有 5200mhA 電池既 WIFI 蛋，雖然只有 3G 速度，但一般上 FB, 睇短片，收發電郵，甚至係用 WhatsApp 電話都綽綽有餘。當然我相信轉用 4G 既 WIFI 蛋應該會更加流暢。

瑞士滯留六個鐘期間，好在有得上下 FB, 睇新聞同睇 YouTube 打發時間，唔係真係發呆變化石都似。如事者去到瑞典後，無需做任何野，只要開著隻 WIFI 蛋後就立即上到網。因為班機延誤，所以要改坐通宵火車上北極圈，行程同上次幾乎一樣。而上次係用 MUNDO 咭，火車離開主要城市後就收唔到訊號，同卡既當地人就繼續輕鬆上網，消磨漫漫長夜。今次呢張 3UK 既咭離開城市後同樣有合理既接收，但今次身心俱疲，大概用到 11 點幾就訓覺。

終於去到北極圈 Kiruna，因為係市中心關係，基本所有台都接收良好。接收好預約既租車後就向 Abisko 進發，Abisko 比 Kiruna 更北，更少人居住既一個小鎮，一小時車程裡面，用接駁好車內藍芽既電話，打開 TuneIn Radio 聽香港收音機，大部份時間既串流都好流暢，中止至回復播放大約係半分鐘至一分鐘不等，當然不計 TuneIn Radio 自己 hang 機要人手重啟呢個因素。去到 Abisko 接收仍然良好，我無特登檢查網絡收到幾多格，但呢兩日一夜既使用，整體上都好滿意，至少唔需要就住就住去用。

話咁快就去到芬蘭既 Rovaniemi, WIFI 蛋過境自動轉網，如果唔係打開個 WIFI 蛋頁面睇都唔知已經轉台，感覺上芬蘭呢邊既網速比瑞典快，因為聽過一次 WhatsApp 電話無乜窒所以有呢個感覺。四日芬蘭使用體驗，用得最多係 Google Maps, 感覺上都 load 得快，最重要係定位準確，縮短搵路既時間。

行程既第三個國家愛沙尼亞，3UK 都有覆蓋而且接收質素十分好，一邊開住 TuneIn Radio 一邊揸車都無斷線或窒。其實無諗過呢個前蘇聯加盟共和國既網絡質素係咁好。雖然只短短逗留三日兩夜，但靠 Google Maps 搵地方既比例要算呢度。

唔知係唔係平時用月費果個都會就住數據用量，今次 3UK SIM 咭連續十五日使用，最大使用感覺係佢偏遠地區都有合理既接收。最後一站返到斯德哥爾摩當然接收良好唔駛多講，返到香港其實佢仲接收到 (話哂係誠哥主場)，而且速度都可以保持水準。好環保既我就緊係用埋果十幾日先拆咭啦。

總結 3UK 上網咭表現拍得住歐洲當地購買既 SIM 咭，加上歐洲既覆蓋既國家都算多，如果要挑剔既，係巴爾幹半島部份國家同埋一西歐幾個小國無覆蓋，但其實去得果幾個國家既都已經係達人以上既朋友，要解決上網根本就唔係一個問題。

購買資訊：

一般包裝都係白色，有 3 個 LOGO，分別有 1GB 15 日，3GB 30 日，同 12GB 30日。

近半年去鴨寮街我都係幫襯北河街交界，紅色大招牌果檔。無論係呢張 3UK，日本上網咭定係之前去歐洲買既 MUNDO 咭都係呢度買。阿姐好 NICE，有問必答，多買都可以搲下電視框。

伸延閱讀：2015-2016 歐洲上網 SIM 咭實測大比拼

中亞兩國見聞錄之天山山脈行山記

2016 年行得最甘既山, 相信都係可一不可再既一次.....

今年年中同朋友遊中亞， 其中一個行程係一個四日三夜既行山活動，地點係吉爾吉斯某國家公園。第一日尚算易行，只係行O左 7 小時。第二日就入戲肉，一條氣由 2000 米上 3200 米，當地山徑無香港咁完善，可以話係接近原始，只係隱若見到前人行出O黎既路，完全無人工修飾。 唯一人工既就係前人沿路砌出O黎既曡石而已。一路走來要手腳並用，上山既路其實只係一堆亂石，每一步都要好小心，否則一係跌落石隙，一係就碌落山二選其一。每一塊石其實都十分尖銳，一不小心就割穿手掌，這只是第二日的行程。

O係 3200 米高既天池旁過了一晚夜後，第三日就要落山，所謂上山容易下山落，下山又係一堆亂石，根本無路可言。領隊就率先以滑雪方式走落山， 眼見領隊三扒兩撥已落山，就膽粗粗學O下，成功下山但就一腳都係沙。其實碎石山只係頭盤，之後既密林先係主菜。沿路全部都係濕滑泥路， 加上斜度大，基本上行快少少就會跣低，每一步都要就住行，加上部份泥路似浮沙，企多幾秒就會下沉，根本無可能中途停下休息。過完密林就開始好行，但其實都係泥屎不分既路。8 個鐘後終於見到有屋，終於唔駛風餐露宿，而且仲可以沖一個靚涼，做番一個正常人。

第四日主要都係行番出城，只需行五個鐘就出番城。雖然可以全身而退，但我諗要我再行多次應該都幾難啦....

今次既四日三夜行山活動，確實令我對行山有另一個定義，而亦因為這次深刻經歷，突然間覺得自己對行山呢門技術認知又增長O左，最少比以前更快去選擇最適合既位置去踩每一步，同埋發現自己既極限仲可以再多少少，我指既係意志上，體力上同埋心理上既極限。呢四日三夜經歷過山泥擋路，真正爆林開路，高山落雹，尖石插手，濕泥落山，過大樹獨木橋等等挑戰，最終都可以全身而退，除O左比O的掌聲自己外，仲要多謝領隊同同伴支持，無你O地我根本無信心可以捱過 3200 米山上過夜，碎石山頂落山.... 種種難關。

今日再睇番香港既山路，其實真係小巫見大巫，當然一O的所謂呃 LIKE 位咩野自殺崖，獅子石等等地方，其實並唔係必然路過既位置，眼見O的人拼死都要行出去影張相為O左放上 FB 博呃 LIKE，其實真係好無謂亦都好不負責任。我覺得呢O的人應該O黎行一次天山山脈，行完後你就會覺得特登爬出去果O的石面上影張不負責任既相真係好無謂。

新年追光到瑞典 PART 2

雖然第一晚睇唔到光，但可以早O的訓覺補返之前搭飛機火車訓得唔好既時光。第二日起身望望個天仍然係白茫茫一片，再睇埋個天氣報告都係預測今日到夜晚都係多雲，但預測到夜晚O的雲薄O的，唯有寄望夜晚有機會睇到。

日頭流流長，食完個早餐又走出去 FING 下，雖然個鎮唔叫好大，但只有零下 6-7 度既天氣下，行一分鐘都覺得行十分鐘一樣咁難。既然呢個雪國通道都係雪，就出去影O下O的同雪有關既相，難得可以感受下零下既氣溫，捱住凍都要出去行個圈。

一路行，風一直吹，其實體感溫度最少有零下 10 度至 12 度，加上經過大樹或簷篷附近，大風會連埋雪一齊吹落O黎，冰雪撲面，真係感受在心頭。

KIRUNA 冬天之日常

由於低估O左零下條溫對電池既影響，部 D610 影O左個零鐘之後就無電，而部 SONY 仔仲可以影多幾張，但同樣因為低溫緣固，所以都係影O左個零鐘都無電。兩部機既後備電都凍到用唔到。

既然相機陣亡，趁機休息下，就咁去O左 KIRUNA 最富貴果間酒店大堂座O左陣，順手睇睇可唔可以租到車。其實出發前都有打算租車去追光，但因為自己太懶又太老定，所以諗住到步先租。出發前都睇過O的價錢，租 4 日都係百幾蚊美金，其實真係抵到爆，可惜唔知乜野原因無去 BOOK 車，到O黎到再睇已經貴O左幾倍，而且仲要去機場取車！O下？除O左的士，可以點樣去機場？再睇O下巴士時間表，嘩！真係嚇死你，每隔幾個鐘先有一班。當見到呢個情況，唯有放棄，當慳返O的錢啦。

租車不成，唯有留O係市中心等運到，又由於市中心只有兩個商場仔比你行，基本上 10 分鐘內一定行哂，所以都係返去 HOSTEL 食個晏，然後又係上下網，順便同O的相機充返電，咁又過一個下晝。

終於到入黑，望O下個天好似都 OK，食完一個快飯就出動。雖然 KIRUNA 係一個兩萬人小鎮，但市中心既街燈真係十分之光猛，所以就算有極光都幾難睇到。根據旅遊中心同 HOSTEL 介紹，市中心北面有一個 CAMP SITE 好適宜睇極光，果度係全市中心光害最低既地方，其次就係滑雪場，但行去滑雪場要 30 分鐘路程同埋 9 點鐘先熄燈。

去到 CAMP SITE 望望個天仲有O的雲但好似唔太厚，沿住 CAMP SITE 條路一直行入去，只見到兩邊越來越暗，但由於路上既雪越來越深，所以行到半路就打退堂鼓，行返出淺雪既地方 SET 腳架。今次真係有備而來，出發前已買定兩大包暖包同帶定兩條毛巾，包住相機既電池位，根據冰雪節既經驗，只要電池保持到溫度，部相機就可以如常操作。

O係零下 16 度既環境下，四野無人，寒風凛烈，極光又未出現既情況下，除O左捱凍，就係捱凍。正當比吹雪吹到無乜感覺時，抬頭望晚空，嚇見有些微綠光由雲層夾縫中閃出，我就知道這是極光。這一刻二話不說就按下快門，調較設定，按下快門；再調較設定，再按下快門，在短短幾分鐘內將微弱的極光收進記憶咭內，其實所謂的微弱極光係要好集中精神，全神貫注，再加少少想像力先可以見到，雖然肉眼好難睇得到，好在相機設定可以搭夠。影O左若干張後，本打算轉個位置再影，誰不知大風將厚雲吹至，將整個天空完全掩蓋，亦將唯一可見的微弱極光都遮住。呆等十幾分鐘都唔見有好轉，唯有打道回府，第一晚追光算係有少少得著。

第一晚追光只有滿天密雲，極光若隱若現

有O左第一次影光經驗，個心開始雄，好想去個更少光害既地方再影一次。因為租車失敗，所以走O左去報 LOCAL TOUR。根據 LOCAL TOUR 價目表顯示，一個包晚餐既睇光團盛惠 SEK $12XX，即係成千三蚊況港紙，你都咪話唔貴。問O左O的細節之後科款，職員話有個 OFFER 比我，只係收 SEK $8XX 而已。其實點解有 OFFER 到呢刻我都唔知點解。

出發當晚，執哂所有同攝影有關既架生上身，包括第一次帶去旅行既 ACTION CAM。今晚既極光團屯括我一共有七位團員，兩位來自澳洲，兩位來自蘇州，兩位來自北京，加埋我成團人幾乎都係「中國人」。其實咁多日以來都已經見到好多中國人，由火車上到 HOSTEL 到遊客中心到呢個 LOCAL TOUR，都可以聽到普通話既聲音，或者因為而家係大陸既新年假期，所以特別多大陸人出遊。出發前職員強烈建議我O地要著由佢O地提供既禦寒衣物，我問其實我已經著O左好多件衫，可唔可以唔著？佢話一定要著，因為夜晚既氣溫更低同埋一陣坐雪地電單車會更加凍，所以一定要著。呢件大會提供既「衫」實在太臃腫，一舉手一投足都好唔自在。除此之外，職員建議一定要戴埋「飛虎隊」頭套再戴頭盔，都係因為同一個理由。成套「戰衣」著好後爭O的認唔出自己。

LOCAL TOUR 所坐的雪地電單車，認真凍到無感覺

終於要出發，領隊兼任司機帶埋我O地一行八人浩蕩出發，大概半個鐘車程後去到一個樹林既地方，落車後抬頭望上天，仍然有一大片雲O係度，希望一陣間O的雲會散開。摸黑落到樹林，已經見到準備好既雪地電單車，因為我報名時講O左唔會揸車，所以安排O左一個雪斗比我坐，而同車既仲有果兩個北京人。當電單車開動一刻，立即感受到乜野叫寒風刺骨，呢一刻就明白點解要著呢套臃腫外衣同頭套，因為風 + 雪撲面既威力真係唔係講笑。好景不常，大隊已經去到森林既中間，但天色仍然唔好，而且無改善既跡象，稍為逗留十分鐘又再起步，今次穿越過一個小山丘，經過一O的密林，輾轉去到森林既另一邊 (其實我都認唔到邊度打邊度)，領隊話呢個位係睇 / 影極光最佳位置，隨即落腳架同 SET 機，但天氣狀況睇O黎都無乜點變好，而隊員由開始時既雀躍到後來的失望，大概十五分鐘後領隊話要走人，我都唯有帶住失望心情收起腳架，收起相機，跳上雪斗，驅車走人。今晚行程又係食白果，但時間已經無多，再過一日就要離開 KIRUNA，唔通連極光都唔鍾意我？

LOCAL TOUR 的風味晚餐

O係 KIRUNA 五日，幾乎無一日好天過，雖未至於天陰陰，但每日唔係密雲就係大風，係O係尾二果日上晝出O左少少太陽，之後又再密雲過。睇睇天氣報告話 1 月 15 號會出太陽，夜晚亦都好天，對於 14 號要走既我係一個太遲喜訊。既然追光無望，剩低既一日半就去參觀當地昔著名既 ICE HOTEL。

星期六去 ICE HOTEL 就只有一班去同一班返，去程同回程仲要相隔 4 個鐘，本諗住去 ICE HOTEL 只花一頭半個鐘就行完，剩低果O的時間點樣過呢？實情係原來 4 個鐘係可以好充實，ICE HOTEL 顧名思義就係用冰去建成既酒店，入去參觀前要去買入場劵，之前聽人講過 ICE HOTEL 好似無人查票，唔知邊個買O左邊個無買飛。我就當然買飛入場啦，而原來買O左飛之後會有一張貼紙比你貼上身，以茲證明你已經科O左水。蒲一入到去已經好令人吸引，成個大堂好似 FROZEN 咁冰雕玉砌，大堂既盡頭仲有一張冰造既「寶座」，只見一班班既人爭住坐上去。ICE HOTEL 最值得入場既原因係佢有成幾十間主題房，每間房都有獨特設計，例如大象，孔雀開屏等等... 認真大開眼界，與其話去參觀 ICE HOTEL，不如話去O左參觀冰雕展仲貼切。

除O左 ICE HOTEL 裡面既主題房外，行得累可以去佢個 CAFE 度抖抖同埋飲野。原來一邊飲住熱朱古力，一邊望住窗外零下景緻係特別好飲O架！飲夠抖夠又再出去行行，行行O下原來行到去尋晚坐雪車經過既地方，但日頭既風景又係另一回事。吸引我過去既係因為有狗拉雪車活動， 離遠已經聽到一班狗吠聲，雖然我好怕狗，但因為佢O地綁住O係架雪車度，所以唔怕行埋少少。原來O的狗仔都好活躍，認真「未出發先興奮」，佢O地吠係因為好想快O的跑一轉咁解。

唔夠兩分鐘兩架雪車就應聲出發，吠聲遠離，一切回復寂靜。望住一片冰封河床，漫天風雪，不禁覺得大自然既神奇。

ICE HOTEL 根本就係一個冰雕藝術展，每一間房都係獨一無二，
就算唔係孔雀開屏房都十分有特色，你會見到藝術家點用燈光去營造每間房既氣氛。

ICE HOTEL 睇完，雪橇狗拉車睇完，野又飲完，原來咁又四個鐘，去遊玩既時間真係過得好快。返到去市中心，週末市集仍然O係度，當然過去行一轉。去到見到好多檔執梗野，心知應該係最後一日，梗係要去執O下野啦。因為先前行過一次，所以知道大概有乜野賣。本來想去一檔凍肉檔買鹿肉，點知呢檔野一早閃O左人。咁唯有轉移目標，睇O下有無特色野買返香港。行行O下見到有一檔阿伯賣鹿皮，大塊 900SEK, 細塊 600SEK，其實我唔知抵唔抵，但O係其他人慫恿下就決定科款買入，點知原來唔夠錢，諗住去撳錢啦，但唔知點解撳唔到錢，氣沖沖返到檔口同阿伯講撳錢失敗，果刻突然醒起自己仲有一O的歐元O係度，就問阿伯收唔收歐元。猶記得果時歐元對 SEK 係 1 對 9 左右，阿伯好人話收我一張 50 歐加 100SEK 成交，變相比O左個九五折我，雖然唔係大銀碼，但外國人果O的不計較既做生意態度真係要好好學習。

O係 KIRUNA 市集，見到好多 "街坊" 出O黎濕平，
一家大細既總會由老竇拉雪橇，阿仔就坐O係上面玩，
真係爽兮兮。市集多數賣禦寒衣物，一塊過既狐狸皮只係小兒科玩意。

光又追完，玩又玩完，買又買完，臨走前仲食O左個 PIZZA，都叫做滿足啦。終於去到車站準備離開呢個令我百感交雜既地方。原來天黑O左既火車站又係另一道風景，就算拖住個重到不行既篋都要停低影相，影低 KIRUNA 最後印象。

後記：今之 KIRUNA 之行目的好單純，就係去追光，其他野都無諗。O係無懸念既情況下所有目的以外既野都係驚喜，例如坐雪地電單車食風，參觀 ICE HOTEL 同睇人O地玩雪橇狗拉車此等種種我都覺得係賺O左。遺憾既係無一早租定車，如果唔係就可以直踩去 ABISKO O係佢既湖邊慢慢睇極光。另外O係火車上認識一位台灣學生，因為佢唔見O左個充電器，所以我借O左一隻水電比佢用。到O左斯德哥爾摩時佢送O左一張上網 SIM 咭比我，雖然要增值先用到，但免卻我四圍搵既時間，真係好多謝佢。

2015-2016 歐洲上網 SIM 咭實測大比拼

自從 FB 流行，4G 網絡成熟，無線分享器 (即 3G MODEM) 價格回落，外地上網 SIM 咭賣到成行成市，出租 MODEM 服務亦如雨後春筍，令人花多眼亂。近年外出旅行其中一個指定動作就要買咭或「租蛋」上網，由於我對於租蛋服務無好感，所以近來外遊都係買 SIM 咭去用，集合近年多次外地 SIM 咭上網經驗，今次就寫篇歐洲上網 SIM 咭實測比大家參考下。

各種歐洲上網 SIM 咭

測試一：歐洲數據卡 1GB 30 天 (購自鴨寮街)
多得台港歐機票，2015 年 9 月出發到希臘，阿爾巴尼亞，黑山共和國，波斯尼亞，克羅地亞，尾站意大利。今次出發前去O左鴨記買O左呢款聲稱 1GB 30 日既 SIM，盛惠 $280，其實買咭果刻仲有其他選擇，但好多只可以用 10 日，14 日不等，咁我有 18 日行程就睇O黎唔O岩用，一係就買兩張 (咁咪成 $500?!)，左揀右揀就只有呢張有 30 日限期，加上平時O係香港每個月都係用 1-2GB 數據，所以肯定夠用有突。

聲稱 1GB 數據 30 天使用期的上網咭，基本上包裝寫明呢兩個 KEY WORDS 都應該係呢款咭。

今次行程帶O左華為呢款有 5200mAh 電池既 3G MODEM 去用，咁就可以比電話同 NOTEBOOK 都上到網。華為呢隻 3G MODEM 雖然唔細隻，但佢有成 5200mAh 電量加上有個 LAN 頭可以將酒店既有線寬頻 (日本最興) 轉成無線網絡，咁全面既功能大隻少少都可以接受既。另外佢仲有一個十分可愛既功能，就係識得自己偵測同設定 SIM 咭網絡，簡單O黎講就係即插即用 (O係某O的特定情況下例外，之後會有講)，對於O係討論區上O的人成日話唔識 SET APN 呀， SET O左 APN 都上唔到網呀諸如此類既問題幾乎唔會發生O係呢個 MODEM 身上。

華為 3G MODEM，係就係大隻少少，只不過有成 12-15 小時電量，足夠你由朝用到晚。

好啦，到步雅典機場，立即安裝 SIM 咭同著機，唔駛 3 分鐘就可以上到網，網速估計有 3.5G 左右，上 FB，上載相片，睇 FB 片，開 GOOGLE MAPS 都好夠快，而且定位亦都十分快，對於我呢O的一出門就要 GOOGLE MAPS 既人係，初步算係合格啦。

呢張咭O係大部份地區訊號都好強，就算坐夜船O係海中間，都有 2-3 格 (最高 5 格) 訊號，估計佢個漫遊合作既電訊商都比佢一個幾高既優先權，O係呢方面真係幾抵讚。

今次巴爾幹半島之旅，有 7 日停留O係希臘，當去到最後一站科孚島，O係最後一日就發現一個好嚴重既問題，一早起身開 FB 睇睇，點知 LOAD 好耐都 LOAD 唔到，最後發現張 SIM 咭上唔到網，試過 RESTART 隻 MODEM，改 SETTINGS... 都唔得，開頭我以為已經用爆O左佢果 1GB QUOTA，加上果日就要搭船去阿爾巴尼亞，唯有去到先再算。

由於阿爾巴尼亞，黑山，波斯尼亞同克羅地亞平均只逗留 2.5 日，所以就打消O係當地買 SIM 咭既念頭，結果去到意大利完結行程都無得出街上網。事後再檢查 MODEM 既流量，發現只用O左 700MB 唔夠，咁點解會上唔到網呢？呢個真係一個迷。

結論：呢張真身叫做 MUNDO 既 DATA SIM 速度合理，而且好多地方都收得唔錯，包裝所示覆蓋國家都非常多，連冷門既波羅的海三國，斯洛伐克，塞浦路斯都覆蓋到，都咪話唔勁。但最大問題就係只係用O左 7 日就上唔到網，但流量未過 1GB，點解會咁樣呢？睇O黎同包裝上寫既 30 日有好大出入。如果旅行日子係多過 7 日既，你要考慮係咪買多一張定係揀另一O的聲稱有 10 或 15 日既 SIM 咭。

測試二：香港行 4G $300 儲值咭 超值歐洲漫遊數據套餐 (都係購自鴨寮街)
又係多得台港歐機票，2016 年 1 月流流走去英，法，葡三國捱凍。經歷過上次 1GB 30 日既「騙局」後，今次幫襯誠哥買O左呢張 14 日歐洲漫遊咭試O下。睇個包裝寫住「香港行」，實質係 3 香港既儲值咭，最大特點就係可以買番 3 既增值劵去增值。

香港行歐洲數據咭，聲稱可用 14 日無限數據

使用呢張咭係有少少技巧，開咭後要輸入 USSD 碼去啟用指定服務計劃先可以用到，否則就有機會按每 kb 計費直接扣除儲值額。同上次一樣，啟用好指定服務計劃後就將張咭裝落華為 3G MODEM 度，今次就要做多少少野，就係O係 MODEM 度手動選擇網絡供應商，根據包裝指示O係英國要使用 3UK，連到線後 MODEM 就自動設定哂所有野可以上網。由於呢張咭聲稱係 4G，所以 3G 都可以兼容，今次無測網速但使用上比起 MUNDO 無咁快，但上 FB 開 GOOGLE MAPS 都唔錯，定位都叫做快，心諗今次無中伏啦掛，有 14 日用應該無問題啦。

澤西島，到步後人都唔多個，但十分舒服。

倫敦 3 日行之後下一站本來到澤西島，呢個英國屬地就無 3UK 覆蓋，而且只有幾個鐘其實都無所謂，加上澤西島市中心唔係大，無 GOOGLE MAPS 都無問題。再下一站就係法國聖馬洛，到步後就更改 MODEM 既網絡供應商做法國 ORANGE 就上到網，O係聖馬洛呢幾日上網感覺仍然唔錯，直到去到波爾多就發覺唔對路，到步波爾多第二日開 GOOGLE MAPS 發現 LOAD 得好慢，慢到要等成半分鐘先 LOAD 哂畫面，開頭以為收得唔好就 REBOOT 隻 MODEM，情況無改善，但又未去到完全上唔到網，唯有玩住先。過O左兩日發現連 WhatsApp 出一句訊息都要等，睇O黎唔多對路，今日只係開咭第 9 日，連線速度比 2G 仲要慢，但由於已經係最後一日O係法國，所以都無奈接受。

最後一站葡萄牙里斯本，到步後經酒店介紹，買O左一張價值 5 歐元既 4G SIM 咭，有 1GB 流量 ，而且仲可以放落 MODEM SHARE，認真抵玩，得四日O係里斯本肯定夠用。裝好咭後，MODEM 一如既往自己設定哂O的野立即上到網，實地開 FB, IG 同 GOOGLE MAPS 都十分流暢，第二日租O左車用埋導航定位十分快同準，由於隻 MODEM 只有 3G 但已經十分流暢，我相信如果上到 4G 應該會有更好表現。

里斯本購入 1GB 數據 4G 咭，已備有 MINI SIM, MICRO SIM 同 NANO SIM，當地售賣 SIM 咭舖頭有售。

結論：3 香港呢張聲稱 14 日無限流量漫遊咭實在令人失望，已經跟足指示開咭同選用服務，上網速度不過不失，但只係用O左 9 日 (嚴格O黎講第 8 日已經慢到不行)，要我O係行程尾段另外再買咭上網，實在好唔方便。錯有錯著O係里斯本買到呢張有 1GB 流量既 4G 咭，仲要無限制落 MODEM 用，加上只係賣 5 歐元，如果以 CP 值去評價呢張咭，我會比最高分佢！

測試三：再次證實歐洲數據卡 1GB 30 天實際只可用 7 日 (同樣購自鴨寮街)
今次出發去瑞典睇極光，由於已經對 3 香港果張 14 日咭無哂信心，加上直到呢一刻我仲覺得上次果張 1GB 30 日既咭係自己用得太盡所以幾日就用爆 1GB，O係揀無可揀既情況下唯有翻兜呢張咭，雖然包裝不同，但張咭同樣係 MUNDO 產品。好，比多一次機會你，希望呢次 13 日既 TRIP 你生生性性。

不同包裝歐洲上網 SIM 咭，其實都係同一張咭

因為之前已經用過，所以大概知道佢有幾快。由於落機同一日傍晚就過夜搭火車去目的地，O係斯德哥爾摩市中心使用都不過不失，但因為有上次希臘既不快經歷，所以趁未上火車前O係附近行O下兼睇睇當地既 DATA SIM 價錢。咁O岩見到有間 3 SHOP 就入去問下有咩 DATA SIM 可以揀，基本上 95SEK 有 1GB 流量，但專門店就無得賣，店員表示可以去 7-11 就買到 (無錯，斯德哥爾摩市中心有好多 7-11，密度可以同日本或台灣既便利店有得比)，收完風之後就放心搭火車。

由於呢程過夜火車有成十幾個鐘車程，所以上車後其中一個打發時間既行為就係上網，但主要都係開 FB 睇。開頭果幾個鐘都幾流暢，但之後就開始覺得慢同無反應，檢查 MODEM 狀態就發現 3G 訊號係 0 格，甚至係 no service。同卡既當地人仲上到網，因為佢個台係當地覆蓋最多果間，而我張 SIM 就揀唔到呢個台O黎漫遊，既然無得上網就唯有訓覺。

一訓醒來火車外風景

終於O黎到北極圈城市 KIRUNA，一訓醒就立即開番哂O的電話同 MODEM，3G 連到線，開 FB 同 GOOGLE MAPS 都流暢，就此開始呢個 5 日極光之旅。O係呢 5 日裡面，除O左市中心外，都有去過距離市中心 30-60 分鐘車程既地方，呢張咭既接收都唔錯，平均有 3 格左右，有時覺得快過 HOSTEL 既 WIFI (可能個 WIFI 多人用所以慢)。一連用O左 4 日都無乜問題，而且今次特登 CHECK 住個流量以免過早用爆果 1GB 流量。到O左第 5 日，亦都係要離開 KIRUNA 既日子，唔想見到既事終於發生，無錯，就係張咭上唔到網，入去 MODEM 度睇O下個 STATUS，果然同上次希臘一樣，流量大概用O左 500MB 左右，個 3G 連下又斷連下又斷，我知道張咭應該已經玩完，計一計日子又係 7 日，結果當晚通宵火車又係無網上既情況下乖乖去訓，已經諗定一落車就去買張 DATA SIM O黎用。

KIRUNA 呢個冰封小鎮基本上唔係好大，全個鎮兩萬人唔夠，但就要面對住地陷危機而要搬遷新市鎮，可能過幾年後再O黎又已經唔同光景。

同卡識O左個台灣男仔，佢係O黎瑞典交流半年，同佢都傾得幾咀，O係落車後佢送O左一張 SIM 咭比我，佢話呢張 SIM 咭都係人O地送，而佢本身又已經有所以就送比我，我只要去增值就用得。之後去O左便利店買增值劵，店員同我講可以買 1GB 流量，只要 50SEK 就有交易。咦，竟然比 3 平咁多，當然二話不說就買，增值方法都係用 USSD 就 OK。呢張咭本身有 4G 但放落隻華為 3G MODEM 都十分快，我估應該有 3.5-3.75G 既速度，下載檔案有接近 1MB 既速度。O係斯德哥爾摩幾日既表現都十分好，直到上船出到公海前都收到，呢 50SEK 真係超值！

台灣男仔送既當地 DATA SIM，同樣已有 MINI SIM, MICRO SIM 同 NANO SIM，瑞典便利店有售。

旅程最後兩日就係芬蘭既赫爾辛基渡過，雖然得兩日，但用開 GOOGLE MAPS 搵食點可以一日唔上網呢，即管去睇O下呢度既 DATA SIM 點賣。市中心唔見有專門賣 SIM 咭既舖頭，就試O下去火車站既便利店問問，店員介紹呢隻 DATA SIM 價值 6 歐元，可以增值。翻開包裝說明，張咭本身已經有 6 歐儲值，如果用電話上網就為每 1MB 為 0.066 歐，計落條數即係唔增值都有 1GB 流量，得兩日時間一定夠用，考慮O左一陣就科款走人。呢張咭又係即插即用，MODEM 自己設定所有野，速度不錯，開 FB 同 GOOGLE MAPS，由於只有兩日時間使用，所以就好放心開串流片睇，睇片都十分流暢，估計有 3.75G 既速度。

芬蘭便利店買到既 DATA SIM，價值 6 歐，有 6 歐儲值，基本上一開咭就可以用到 1GB 數據。

結論：經過兩次旅程既實測，我可以肯肯定去證明呢類所謂 30 日 1GB 流量既 SIM 咭根本就只可以用到 7 日，而後來上網 CHECK 返佢個網頁，呢款咭唔可以再增值，網站亦都無顯示佢有 30 日既 DATA SIM 賣，所以包裝上寫既 30 日根本就係假既，而流量有無 1GB 就唔肯定。瑞典本身係一個通訊發達既國家 (ERICSSON 就係瑞典牌子)，加上 7-11 林立，買張 DATA SIM 上網根本無難度，而且價錢仲好平 (1 港元約等於 1.15 瑞典克朗)，根本就無需要O係香港買定咭過去。而芬蘭購買 DATA SIM 亦都好方便，基本上 6 歐元面值就有 1GB 數據，同樣抵買過鴨寮街既 SIM。

總結：香港買得既歐洲上網咭質素參差，就算係大牌子都中伏。呢張 MONDO 雖然就可以多國漫遊，但問題係得 7 日限期，7 日可以去幾多個國家呢？究竟想要多國漫遊，定係想去到當地買平靚正 SIM 咭真係自己衡量。不過可以咁睇，200 幾蚊可以玩到 7 日圍埋都係 30-40 蚊一日上網，應該比租 WIFI 蛋平得多。而 3 果張歐洲漫遊咭感覺比 MONDO 伏得多，因為佢寫住「14 日無限數據」令人覺得 14 日內都有同等既使用體驗，但給果事與願違。曾幾何時有一種出租日本 SIM 既服務，但效果就真係好不堪，有機會都寫下唯一一次既使用感。

歐洲當地購買上網 SIM 咭十分方便，報紙檔，便利店甚至超級市場都可以買到，今次旅程可以實測瑞典，芬蘭當地既上網 SIM 咭，實在太令人喜出望外，除O左價錢非常合理外，而且速度無得輸。最後當然要講埋葡萄牙果張 4G DATA SIM，面值 5 歐元有 1GB 數據，速度快，O係咁多張外地購買既 SIM 咭呢張可謂 CP 值最高，大力推薦！如果想知O係邊度買可以留言比我。

另外想講埋華為隻 3G MODEM，當而家 4G 流行時可能覺得 3G 唔夠快，但睇返規格呢隻 MODEM 最快可以支援到 43.2Mbps (HSPA+) 下載，而且可以連接 10 個裝置，加上 $700 有找既售價 (市面上最平既 4G MODEM 索價 $1300 左右) CP 值十分高，旅行時用O黎 GOOGLE MAPS, 上 FB 或上載照片到 IG 都十分方便夠用。有人怕唔識設定搞到得物無所用，呢曾唔駛擔心，只要將 SIM 咭部份全部設定做 AUTO 就可以根據 SIM 咭參數自行設定，基本上換完咭等幾分鐘就可以上到網。

伸延閱讀：
3UK SIM 上網咭使用體驗評 2016-2017
2017 德國實測歐洲上網 SIM 咭大比拼 (3UK, 聯通香港, WeChatGo)