台灣六天環島鍊車行 PART 3

雖然枋寮呢個小町十分舒服，但為環島終需一別。以為 07:00 起身，07:15 出門口買早餐會係最早果個，點知一去到轉彎果間早餐店時，已經有一班人o係度堂食中，另外仲有幾個人o係度等外賣。其實係我以為自己好早定係佢o地不嬲都係咁早起身呢？

極速食完個蛋餅豆漿早餐就立即出車，時為 07:30 左右。經歷過尋日 over run 既慘痛後，今日誓必準時到步花蓮。但 GOOGLE MAPS 話比我知今日要行 300 公里路，唔知會唔會又甩轆收場呢？既然行到呢一步都無得返轉頭，老虎就老虎啦！

枋寮既鐵馬客棧，細小但舒適

台 9 線沿海而建，如果有時間落車休個息影影相，欣賞太平洋既絕景

今日有兩大任務：
1. 挑戰全台最長碎石路 197 縣道
2. 拜訪全台最美麗道路 193 縣道

起步沿台 9 線向台東方向出發，開頭四線行車行得十分爽，幾乎係逄車過車，好不開心。直到台東縣界前就收剩來去各一條線，令人煩惱既旅遊巴又再O係前面出現，焗跟十幾分鐘先搵到機會抽佢頭，但龜速既旅遊巴又何只一架呢？結果要花兩個鐘先去到第一站──太麻里火車站，時間為上午 10 點 10 分。

台 9 線沿途既休息處都好有特色

太麻里火車站有乜野特別呢？早排網上流傳過一輯相，就話台灣都有一個平交道位置同「鐮倉高校前」既平交道有九成似，而呢個平交道就係O係太麻里車站附近。既然經過，何不順道朝聖呢？如事者就過O黎影番幾張相，順便落車抖下，之後就出發去搵我既 197 縣道。

驟眼睇，呢個平交道真係好似「鐮倉高校前」個位喎！

架車後面就係志航空軍基地

前往 197 縣道途中，突然聽到一聲巨響，個心有O的離一離，定神一刻有架戰機O係眼前飛過！無錯！係戰機！原來呢條路既隔離就係台東志航空軍基地，隨時有戰機升降，本來想捕O下一架戰機降落，但尋日 over run 既陰影作祟下還是作罷。大概一個鐘車程就O黎到 197 縣道入口，縣道 197 全線位於台東縣境內，北起池上市區，南至台東市石川，全長將近60公里，今次由南邊入口北上，入口仍然係好靚既柏油路，唔通我行錯O左？再睇睇 GOOGLE MAPS 證實無錯，唯有驅車繼續前行，大概十分鐘後終於見到傳說中既碎石路，挑戰正式開始！

縣道 197，還未到 14 公里碎石路前風景十分迷人

縣道 197 既碎石路，真係少O的心機都會飛落山崖

當四個轆都O係碎石路上，立即感受到成個操控唔同哂，軚盤變得好輕好浮，尾轆亦都有隨時甩出去既感覺。雖然有 30 公里限速既路牌，但呢一刻我唔敢行快，亦唔敢扭快軚，每一步都小心翼翼，因為根本無可能以 30 公里速度去行走呢條碎石路，大概行O左 10 分鐘已感到架車不斷飄移，其實我只求可以安全完成路段就十分滿足。

台東志航空軍基地

沿路雖然風光明媚，但大部份既心機都用O黎控制住架車既動態，亦因為速度比預期中慢，所以停低影相既次數亦比之前少得多。其實整段 14 公里既碎石路又碎唔哂，偶爾有幾十米既石屎路面出現，睇落似係新舖無幾耐，算係暫緩行碎石路果種緊張。但我又諗如果整段 14 公里都變成石屎路，咁就無O左 197 縣道特色囉？整條 14 公里碎石路幾乎杳無人煙，尤其是O係花東縱谷路段時，真係叫天不應叫地不聞，呢種感覺真係幾弔詭。

14 公里碎石路中，有部份已舖成石屎路

部份碎石路段路面比較闊，可以嘗試一O的唔同既揸法例如輕微甩尾，試O左幾次覺得幾得意，亦都救得到，但條件係條路一定要有 10 米闊，唔係就會連人帶車碌落山，到時真係嗌破喉嚨都無人理你。本以為試玩O左幾次甩尾就掌握到當中技巧，事實上就O岩O岩相反，O係差唔多到尾聲時咁O岩有一班單車友O係友上梗斜，當刻打算收慢O的架車費事嚇親佢O地，點不知尾轆突然甩出O黎，呢一刻立即鬆腳制比少少油想修正架車，但已經太遲，車尾已經向左邊甩出去，成架車 90 度側滑，車速雖唔快但路面窄，一邊滑一邊踩腳制希望佢唔好飆前，否則真係碌落山，但架車仍然繼續滑向前，而車頭亦都向住路邊指向前，O係千鈞一發之時路面右邊有幾舊石壆O係度，咁O岩車頭就向住呢幾舊石壆指埋去，最終頭泵把撞到石壆先告停低，驚魂未定就落車睇睇「傷勢」，真係不幸中之大幸，本以為聽聲停一定成個泵把爆哂，點知只係擦花少少，近裙腳位置就穿O左一個細窿，其實真係呢幾舊石壆救番我一命，唔係都唔可以打呢篇遊記比大家睇。

197 縣道俯瞰

定驚過後繼續行程，碎石路過後亦都係代表花東縱谷已經行完，當經過電光村時兩邊都係田地，由於並唔係插秧期，所以只見到一幅幅泥地而已。最後到達白朗大道所在地既池上鄉，二話不說梗係要試O下名物池上飯包，但又咁O岩O係停車位置有一家牛肉麵店，而且睇O黎都幾多日幫襯，所以就決定首先食一碗牛肉麵，然後再去食池上飯包，咁就一次過滿足兩個願望。

一行完碎石路立即停低定O下驚

食飽飽後就梗係幫襯O下當地農會超市，買幾包池上米返屋企嘆，當然只係買 2KG 果隻。買完後立即驅車繼續上路，下一站 193 縣道。

197 縣道起點

馳名既池上飯包，門口有成卡火車比你一嘗火車便當滋味
完全符合商品說明條例，好野！

台灣常見既紅綠郵筒，仲有「停看聽」牌

賣米O者，唔駛咁華麗話...

池上飯包，終於到我食啦！

沿台 9 線一直行，轉行台 30 線，去到分叉路靠右就進入 193 縣道範圍。193 縣道又叫樂德公路，全長 110 公里，翻查維基為全台最長縣道，而且全條縣道都係O係花蓮縣之內，所以當進入縣道即代表已進入花蓮範圍。沿路兩邊都可見一覽無垠既田景，配以中央山脈做背景，一幅又一幅既油畫級風景就O係眼前出現。縣道 193 比縣道 197 工整得多，整條路同台 9 線平行而上，但論風景一定係 193 縣道完勝，因為縣道 193 海拔比台 9 線高，所以隨便一個位都可以俯瞰整個花東河谷。

停車隨手影，193 縣道果真名不虛傳

縣道 193 果真名不虛傳，雖然而家唔係插秧季節，但沿路都可以睇到好靚既水稻田，平靜既水田，加上開揚既景觀，一個完美既倒影就在眼前，隨便舉機都可以影到張靚既相。又因為咁樣所以今段路所用時間比預期長，但都係值得，O黎到 193 縣道就係要影靚相吧。

就O黎日落啦，穌光照稻田

一路上行行停停，不知不覺就O黎日落，希望今日唔好又天都黑哂先到住宿。好在O係大概 5 點鐘就到花蓮大橋，意味住要進入花蓮市區，而最靚景觀既 193 縣道亦都到此為止。再揸多半個鐘左右終於去到住宿處，但呢間住宿既 CHECK-IN 好特別，首先要O係門口既電話打去接待處，核對完身份後就講低大門同房門密碼，之後就自便。哈，呢個玩法又幾新奇，成間民宿可以一個人都無，我諗只有台灣先做到。擺低野之後就出發去行夜市。花蓮既夜市對上果次O黎好似係 2005 年，原來成 10 年既事！今次再O黎發現果個好大既鐵皮棚已經無O左，換O黎係一個新既夜市叫做福町夜市。其實福町夜市係東大門夜市既一部份，另外仲有原住民一條街同各省一條街三個地方組成。成個夜市面積比以前大幾倍，但唔知係咪因為有毛毛雨，所以行既人唔多，係部份食肆比較多人等位外，成個夜市都行得幾舒服，不過都留意到有部份檔口未有出租，呢個可能都係少人行既原因。花蓮夜市有個特色就係有好多檔鋸扒既攤檔，仲有好多檔玩遊戲例如拋樽，射槍等... 呢個新既夜市都一一保留到，但唔知係咪中間條路太闊，感覺上唔及以前咁熱鬧。

193 縣道必經既花蓮大橋

扒鋸完，愛玉冰飲完，又係返去休息之時。因為夜市同住宿有一段距離，所以都係以車代步，返到去後就咁將架車泊O係樓下就 OK，呢種便利只有台灣先有。

東大門夜市其實由三個夜市組合而成

地方乾淨，路面寬闊，點睇都唔似去開既夜市

夜市基本盤，食哂應該行唔郁

花蓮女鼓神，勁呀！

今時今日仲有呢O的野抽，真係好懷舊

有原住民現場表演，好正

點解夜市中間會有一幅攀石牆既？

今日總算係準時完成 300 公里路，經歷過 197 縣道既刁難，193 縣道既美景，去到花蓮仲可以輕鬆行夜市，我知道今日真係賺O左。聽日最後一日啦，希望聽日行蘇花公路都順順利利就好啦。

第三日路線參考：

伸延閱讀：
台灣六天環島鍊車行 PART 1
http://chungsiutravel.blogspot.hk/2015/11/part-1.html
台灣六天環島鍊車行 PART 2
http://chungsiutravel.blogspot.hk/2015/11/part-2.html

台灣六天環島鍊車行 PART 2

晨咁早 07:00 起身，酒店有「地道」早餐供應─台式三文治 + 米漿，極速五分鐘 KO 後就去取車走人。水社碼頭對埋有一個好大既停車場，泊過夜 + 酒店折扣劵只係 200 新台幣，我諗香港無可能有一個咁平既過夜場。

講o下少少酒店野，呢間潭香時尚旅店o係網上睇相幾靚下，但現實同相片真係爭好遠，雖然如此佢都仲有優點，就係o係正水社碼頭附近，由停車場行過去只係五分鐘。如果想就腳又想住得靚既，都有好多揀既，只不過今次環島之旅住宿並唔係我既重點，所以就無所謂。

取車出發，時間尚早，就立即去最鄰近既地標「向山遊客中心」行個圈。向山遊客中心於 2010 年完工後就成為日月潭最新地標，由日本設計師操刀，整個建築以「清水模」為外觀材質，如果你有見過安藤忠雄既作品就知道清水模係乜野。

向山遊客中心，難得清靜

向山遊客中心之前已經到訪過四五次，但今次係第一次咁少人 (晨早 7 點幾應該有幾多人呢?)，行得好舒服。可惜今次無帶單返出o黎，想影闊少少既畫面都無機會，希望再有下一次o黎啦。

日月潭附近有多間寺廟

上車向阿里山出發，沿台 21 一路上山，大概個零鐘後到達新中橫既地標─夫妻樹。夫妻樹本為兩棵紅檜木，於1963 年一次森林大火後奇跡未倒，而兩棵樹既形態又好似一對夫妻互相依偎，所以被稱為夫妻樹。而因為夫妻樹位處於台 21 線最高點，所以視覺上令舍壯觀。雖然時為上午 10 點幾，但已經有若干人o係度同棵樹影相，好不容易先搵到人幫我同棵樹合照，既然o黎到點都要到此一遊既。離開夫妻樹後下一站就係阿里山，但只過門而不入，因為太多人太多車，好難迫入去影張到此一遊。沿台 21 一路落山，大概個零鐘後到達台 3 線十字路口，轉左沿台 3 線繼續路程，下一站阿婆彎。

台 21 線 (即新中橫) 沿路風景 

台 21 線為雙線雙程，沿路都有慢速指示牌

台 21 線名物 - 夫妻樹

逢假日就有大批電單車上挑戰各大山道

台 21 線芙谷莪橋

阿婆彎之所以得名，事緣o係台 3 線 312 公里附近有一間士多，士多由一位阿婆主理。每逢假日就有好多電單車o係山上飆車，而阿婆不堪呢o的嘈吵既電單車聲就走出o黎破口大罵，時間耐o左此事就o係車友間廣傳，後來呢個彎位就多o左個新名叫阿婆彎。到步後都見到有幾位車友o係度休息，開頭我以為阿婆真係好惡，觀察落原來阿婆都幾友善，我諗佢破口大罵都係因為電單車聲太嘈之已。

阿婆彎

阿婆彎的阿婆

台 3 線 312 就係阿婆彎所在

去完阿婆彎朝聖後，經過曾文水庫後穿過大埔拱橋到達玉井，稍作休息後再往台南市區出發。本來應從台 20 線直到台南市，但出發時已是下午 2 時半，假如沿台 20 線落台南恐怕日落先到步，所以改行台 84 轉 1 號國道到台南，終在 4 點前到達台南。本來想幫襯火車站附近既鰻魚飯，點知無開檔，唯有求其搵o左間日式快餐快快食一餐又再起行。

天色開始轉暗，而家真係要兼程趕路去府城天險。位於台江國家公園內既府城天險古時地勢險要而得名，位置於鹿耳門港道，同時亦為古時台灣八景「鹿耳春潮」與「鹿耳連帆」所在地。今時今日已經成為欣賞日落，漁船歸航美景之地。當我極速到步府城天險時已時為五點幾，但因為雲多所以欣賞唔到紅霞日落呢個靚景，草草影o左幾張相又再出發，根據預定路線下一站為屏東縣既枋寮。

府城天險日落

本來以省道 + 縣道為主既環台行，因為今日時間安排實在太差，所以呢一程要改行 1 號國道，轉台 88 線到 3 號國道，五點九出發，終於o係八點左右到步。入住鐵馬客棧，一間細細民宿級既住宿，主人就o係轉彎一間單車舖開工，所以有乜事要搵主人都好容易。枋寮真係一個好細既地方，可以話得果兩條街而已。隨便去o左附近一間食店，叫o左個蝨目魚湯，一個撈麵，盛惠 90 大元，抵食。食完之後舖頭仲未收就四圍行o下，11 月天時都唔覺凍，而且仲十分舒服，買埋一杯 50 嵐就返歸休息。

枋寮社區掠影

今日既日程雖然甩哂轆，準備又差，不過可以走訪阿婆彎，台江國家公園其實已經好開心。如果可以早o的到步枋寮，未天黑前去行o下呢個小社區就更加好，唯有下次有機會再o黎啦！

Day 2 行程路線圖，僅供參考。

伸延閱讀：
台灣六天環島鍊車行 PART 1
http://chungsiutravel.blogspot.hk/2015/11/part-1.html
台灣六天環島鍊車行 PART 3
http://chungsiutravel.blogspot.hk/2015/11/part-3.html

台灣六天環島鍊車行 PART 1

今次揸車環島可算係創自己一次紀錄，
本應五日先完成既路程四日就搞掂，同當年坐火車快閃環島無分別。

今時今日，去台灣旅行已經係家常小菜一碟，加上近年機票大殺價，去台灣分分鐘平過去澳門，而最近我就去了三日台北當散散心。

就是啦，今時今日寫台灣旅行一是吃喝玩樂，一是扮文青去睇藝術，去咖啡座 hea  半日，再唔係就兩日一夜快閃遊，由 day 1 07:00 玩到 day 2 21:00 返港再第二日返工。呢類遊記大多得到好高點擊率同分享，如果我想呃 like 既都可以寫返一個咁既遊記一樣可以呃 like，只不過我認為寫一個 (曾經流行過既) 環島遊記義意會大得多。

環島，好多人所認知係單車環島，但今次我呢個環島就用四個轆去完成。有人問揸車環島有乜野特別？因為我唔係行高速公路喪踩，而係選擇省道 + 縣道，沿路探索鮮為人知既台灣特色地方，呢個就係我要寫既理由。

省道級既台 3 線有著四線雙程的優勢，全程都揸得十分爽

揸車環島同踩單車環島同樣都要做事前準備，由於是次行程以省道 + 縣道為主，完全唔會行高速公路，所以每日行程所途經既地點，去拜訪既地點都需要周詳計劃，否則可能會環島失敗。

自駕其中一個好處就係去到一o的旅行團或搭車唔會去到既地方

今次所租既戰駒無論外觀或內籠質素都係麻麻，
下次都係租返艾維士算了

雖然標題寫六日環島，但事實係第三日先出發環島，即係只有四日時間就要完成環島之旅，初步構思路程如下：

Day 1

台北出發經台 3 線，經土城，大溪，關西到達南庄老街，午飯 + 速遊，再出發經縣道 124，台 3 線到達東勢，轉行台 8 線，台 21 線到達埔里酒廠，夜宿日月潭。

Day 2

日月潭出發，續行台 21 線到塔塔加及阿里山，再經大埔鄉初探阿婆彎，再轉落台南車站午飯，飯後再到府城天險，夜宿枋寮。

Day 3

晨早枋寮出發經台 9 線到台東，再沿台 11 線，台 11 乙線轉行挑戰縣道 197 到達池上午飯，沿台 9 線轉行縣道 193 拜訪光復糖廠回縣道 193 到達花蓮市。

Day 4

花蓮市出發沿台 9 線經羅東，坪林，新店回到頂溪還車。

認住呢一間萊爾富，當地車友稱之為「三七萊爾富」，
因為佢就座落o係台 3 線同台 7 線交界所以得此稱號。
逢假日就可見一眾準備去羅馬公路既電單車聚集，好不熱鬧。

南庄老街古廟同郵局，郵局外觀明顯係日治時間的設計

理想同事實一定有距離，第一日取車已覺不爽，平常到台灣租車會幫襯艾維士，但今次試新野，幫襯了一家叫慶賓租車既公司，之前睇佢網頁覺得略有規模同埋價錢比艾維士平一點，而且仲可以指定車款，而我想租到本田既 FIT，因為呢個款既操控強，又夠慳油，所以最後就幫襯佢。

當去到頂溪站取車時，車身外觀實在麻麻，感覺很舊很殘，而且好多花痕。再檢查內籠，算不上乾淨但明顯無乜點清潔過。未出發已對自己架戰駒無哂心機，但既然已成事實，唯有接受。出發行台 3 線，四線雙程，除台北地區比較塞車外，全程都十分暢順，加上陽光普照既天氣，取車時低落心情已一掃而空。

仙山協天宮

清安豆腐街雕像

不用多說明去到必食之物吧

大概兩個幾小時車程後到達南庄老街，南庄老街係台灣人假日熱門旅遊點，雖然位處山區交通方便，自行揸車都可輕易搵到泊位。到達後立即食個晏，之後就來一個速遊。著名地標有老街郵局，桂花巷美食街，永昌宮，康濟吊橋等。假如五月到訪，仲可以睇到著名既油桐花，夜晚亦都可以睇到螢火蟲。可惜我要趕路，否則兩日一夜南庄遊的確唔錯。

快閃南庄下一站就係日月潭，今次應該係第四次探訪，由南庄老街沿縣道 124 接落台 3 線，經過獅潭後轉入清安道路，到達第二快閃打咭位「清安豆腐街」。清安豆腐街幾乎沒有港人來過，可能整條老街規模比較細同比較隔涉，所以無乜香港人識o黎，其實都係一件好事，至少我可以靜靜地快閃一下。唔知係咪閒日原因，有好多舖頭都無開，就連當地最大一間 CAFE 都無開門。好在仲有幾間賣紀念品，賣豆干既舖頭開門。見佢o地咁有心開檔，就買o左兩包o黎看門口。

去到日月澤雖未到七點，但天已經黑哂

雖然話係快閃，但都逗留o左成個鐘，離開時開始收太陽，依原定計劃沿路台 3 線轉到台 8 線，再轉落台 21 線一直南下，但因為今日太遲出車又或用太多時間o係度行街，所以就算經過埔里都無時間入去埔里酒廠行一圈，最終夜晚七點前到達日月潭，可算係準時完成第一日路程。

首日路程路線圖參考：

伸延閱讀：
台灣六天環島鍊車行 PART 2
http://chungsiutravel.blogspot.hk/2015/11/part-2.html
台灣六天環島鍊車行 PART 3
http://chungsiutravel.blogspot.hk/2015/11/part-3.html

女伴？還是旅伴？

去旅行，很多人都想和親戚好友一起去，其中一個原因是即時的喜悅即時可以分享。但現實很多時和理想剛剛相反，去完旅行後就和朋友反面的其實大有人在。這個問題我也想過如何避免，但每個人的價值觀都盡不同，就算最面面俱圓的交際高手都有束手無策之時。

我覺得自己是一個幸運的人，但就不懂珍惜這些幸運，到幸運走了才去婉惜的那種。

記得在 2010 年一次土樓之旅，陰差陽錯下認識了同樣愛去旅行的 W，在出發的火車上我們有說不完的話題，這是我第一次有很強烈「是對的人」的感覺。土樓之旅後一班人相約出來聚會，席間和 W 言談甚歡，甚是投契。後來的發展就如電視橋段般，由人多到人少到兩個人相約。那個時候 W 主動向我表白，可是我當時「竟然」婉拒了，我還記得我說「我想同了解你多o的，可以做朋友先嗎？」，當刻 W 的反應是立即收起期待表情，很瀟灑地說沒緊要。

和 W 的來往沒有因為這一次而中止，但只限於間中相約食飯那種。

一年後 W 無端問我去歐洲的事，言談之間原來她想去一次，這好像是她第一次 (！？) 去歐洲，碰巧我又正在查看歐洲機票，當中有些細節已忘記，但最後我們相約了這次旅程。

其實這是我第一次和朋友去歐洲，正當擔心如何相處時，W 幾乎全程都很「遷就」我，例如我想租車，W 說就租車；我想住平一點，W 說就平一點。有一次，在巴黎某條橫街路過一間餐廳，餐牌上有一個有 24 歐鵝肝的餐，W 看來很感興趣，不過我說 24 歐好像很貴，W 就說「走吧」，然後我們就走了。回來後我反覆重播當時那一刻畫面，每想一次，心裡就不安一次，就好像有把聲音譴責我的孤寒。其實只是 24 歐，又何必那麼計較？

我沒為 W 設想，W 表面上沒什介意但我覺得她內心一定十分失望，但又沒有做出港女的扭計行為出來強迫我去，一想到這裡內心的責備就更加嚴厲。發生了的事已無法挽回，唯有在此向 W 說一聲對不起，我錯了。

人生在世，誰不想找到一位好伴侶？但對旅行者來說，一位好的旅伴比一位好的伴侶來得珍貴。好的旅伴就是不計較，說了沒所謂就沒所謂，不會與你鬥氣，不會無理取鬧，全程享受旅程樂趣，由出發到歸來都歡樂滿滿。

可是，上天不會眷顧蠢人兩次的！

很多人已寫過的旅行文章, 為何我現在才去寫?

誠言我是一個很懶的人，沒太多心機和文字糾纏，另一方面又想將旅行的事做個紀錄，當這兩個極端同時出現時，我都是選擇前者，其實還有一些原因，我去過的地方，人家都有去過，人家都有寫過，我還寫來幹嗎？

其實旅行的體驗每個人都不同，例如大家都是去台北，你去的台北和我去的台北盡是不一樣，因為大家的偏好都不同，所計劃的行程都不同，想到這一點，又令我重新對寫網誌有興趣起來。

除了千辛萬苦開了這個網誌外，同時亦開了一個 FB 專頁，希望日後多點心機去經營這兩個空間，將我多年來去旅行的心得，體驗和經歷都放上來，將來年老體弱時給自己回味一番。

以前曾有想過開一個網誌，當時亦想過究竟是順 (旅行) 時序去貼文好還是按地區貼文好，又還是... 現在想通了，當日想到某一次旅行，就寫那一次旅行，這樣簡單很多。

巴爾幹半島世遺之旅 2015 (一)

巴爾幹半島地理上指位於歐洲東南部，三面環水的陸地，東面向著黑海，南面向著地中海 (愛琴海)，西面向著阿德行亞海...... 但近代 (尤其是旅行界) 就指前南斯拉夫地區。人稱歐洲火藥庫既南斯拉夫地區大名由來有幾種說法，其中一種說法是因為巴爾幹半島具有戰略地位，成為兵家必爭之地，十九世紀末就被歐洲列強瓜分，加上俄國虎視眈眈，造就第一次世界大戰發生...... (下刪三千字) 而今次的旅程就由第一次自助遊的國家──希臘出發。

這次旅行，本來想在 2012 年實行來個自助旅行 10 週年紀念。但種種原因終於推遲到 2015 年才出發。行程為時十七日由雅典起步，先到 Paros 呆幾日，再快閃一日到 Santorini，玩過 Cyclades Islands 後轉到 Corfu 科乎島造訪世界遺產。希臘玩夠後坐渡輪北上阿爾巴尼亞直闖 Berat 一睹千窗之城既風采，亦都係另一個世界遺產城市。

繼續北上向黑山共和國進發，阿爾巴尼亞資訊落後而且混亂，幾經辛苦最後坐住架古董 BENZ 到步首都波德里察，三日兩夜既行程裡，臨時加入去 Kotor 高托古城──另一世界遺產。三日兩夜黑山之旅完結後坐早車到聞名已久，波斯尼亞首都薩拉熱窩。由於單細胞工作既缺點，竟然訂早一日住宿而不知道，要去到 CHECK-IN 時才嚇然發現，但已經太遲，唯有將兩日遊縮成半日遊，好在薩拉熱窩市中心都十分好行，幾個鐘都可以來一個速遊。

到步克羅地亞當然要去十六湖公園，又一世界遺產，再到南面同樣是世畀遺產的 Dubrovnik 杜邦力克古城漫遊。後來上網才知道所住的 Split 斯普利特都是世界遺產級的古城。最後坐通宵渡輪到意大利 Ancona 為旅程作結尾。

假如下一次再來，我會不猶疑地在黑山，波斯尼亞和克羅地亞租車遊，除了慳回很多時間外，而且還可以去到公共交通去不到的地方。誠然這幾個國家的公共交通並不如西歐般方便，自己開車似乎是十分合理。

究竟這個慶生兼十週年紀念行程有什麼事發生？且看下回分解。

柏拉於區處處都有賣帽的商販

雅典版的「耿耿於懷」？

路上行人

密集的商舖有如女人街，但比女人街舒適得多

隨街可看到的塗鴉，層次是藝術級吧！